هەڵبژاردنی پەرلەمانی كوردستان لە وادەی خۆیدا ئەنجام دەدرێت

دوێنێ چوارشەممە 22ی نۆڤەمبەری 2023، جومانە غەلای، گوتەبێژی كۆمسیۆنی باڵای سەربەخۆی هەڵبژاردنەكانی عێراق ڕایگەیاند، هیچ هۆكار و بڕیارێك نییە بۆ دواخستن و ئەنجامنەدانی هەڵبژاردنەكانی پەرلەمانی كوردستان، بۆیە هەموو ئەو دەنگۆیانە ڕەت دەكەینەوە كە باس لە دواخستن و ئەنجامنەدانی پرۆسەكە لە وادەی خۆی دەكەن.
گوتیشی: هەموو ئامادەسازییەك لەلایەن كۆمسیۆنی باڵای سەربەخۆی هەڵبژاردنەكان كراوە و هەریەك لە سەرۆكوەزیران و سەرككۆماری عێراق و سەرۆكی هەرێمی كوردستانیش، بۆ ئەنجامدانی هەڵبژاردنەكە لە وادەی خۆیدا پاڵپشتی و هاوكاری تەواویان كردووین.
گوتەبێژەکەی کۆمسیۆنی باڵای هەڵبژاردنی عێراق روونیکردەوە: "هەڵبژاردنی ئەنجوومەنی پارێزگەكانی عێراقیش بە هەمانشێوە لە وادەی خۆیدا ئەنجام دەدرێت و هیچ گرفتێكی لەبەردەمدا نییە، لەگەڵ هەڵبژاردنی پەرلەمانی كوردستان لە كاتی دیاریكراوی خۆیان ئەنجام دەدرێن".